مامۆستا ئەحمەد کاکە محمود (٥٦) ساڵ خواپەرستی

مامۆستا ئەحمەد کاکە محمود  (٥٦) ساڵ خواپەرستی
– دڵسۆزی و خۆشەویستی – نیشتمانپەروەری  - خەبات و کۆڵنەدان

ڕۆژی ٢٥/١/٢٠٠٧ بەرامبەر  (٦) ی محرم ی ١٤٢٨ کۆچی سەرکردەو مامۆستا (احمد کاکە محمود) زاناو داناو بلیمەتی کوردستان و بزووتنەوەی ئیسلامیی  لەبەرەبەیانێکی خامۆش و بێدەنگ دوای بەجێ گەیاندنی فەریزەی نوێژی بەیانی بەکۆمەڵ لەگەڵ خانەوادە بەڕێزەکەیداو لەکاتی سەرقاڵبوون بەخوێندنی قورئانی پیرۆزو نزاز پاڕانەوەو ویردی بەیانیدا، دڵە گەورەکەی لەلێدان کەوت و بۆ دواجار ماڵئاوایی لێکردین و ڕۆحە پاکەکەی فریشتە ئاسا لەشەقەی باڵ ئەدات بۆ ھەوارگە ھەمیشەییەکەی بارەگای خوای باڵادەست کۆچی کردوو بزووتنەوەو بنەماڵەکەیی و دۆستان و خزم و خێشت و قوتابییەکانی بۆ ھەتا ھەتایی بەجێ ھێشت. بەکۆچی دوایی ئەم زاتە بەرزو بەڕێزە بەشێوەیەکی گشتی ئاسمانی ئیسلام پەروەری زانایان و کەڵەپیاوان  گەیشتەوە بەردەم ئاستانەی خودا. مامۆستای خوشەویست گەشتەکەتان خێربێت و  ڕێبازە پیرۆزەکەتان ئاوەدان و پڕبێت لەڕێبواری نەفەس درێژو ماندنەناس .
مامۆستای پایەبەرز ھەرلەسەرەتای منداڵییەوە لەیاڵانپێ تاکۆچی دوایی و ئەو مەنزڵگەی کەلێی گیرسایەوە سەرتاپای ژیانی تەرخان کردبوو بۆ خزمەت گەیاندن بەئیسلام و گەل و نەتەوەکەیی و ئازادکردن و  ڕزگارکردنی لەچنگی داگیرکەران، ھەمیشە ئامادەبوو بۆ ڕووبەڕووبوونەوەی ستەمکاران و تاغوتان، خاوەن ئیرادەیەکی بەھێزوو لەبن نەھاتووبوو، کەسایەتییەکی بیرتیژو سەرنج ڕاکێش و بەوورە بوو، مرۆڤێکی نەوعی پاک و بێ خەوش بوو، مرۆڤێکی ڕاست و ڕەوان و حەق بێژبوو، ھیچ کاتێک بێدەنگ نەدەبوو گەر ناحەقی بیستبا، زانایەکی ھەڵکەوتوو دیاری کوردو ناوڕابوونی ئیسلامی کوردستان بوو، نووسەرو زانستخوازو قەڵەم ڕەنگین و سەرکردەو ڕێبەرێکی چاونەترس و پێشمەرگەیەکی قارەمان بوو، ڕاڤەکەری قورئانی پیرۆز بوو،  ماناو مەبەستەکانی پەرتوکی خودای زۆر بەباشی شیکردۆتەوەو تەفسیری ڕامان کەیەکێکە لە بەرھەمەکانی  بەڕێزیان باشترین گەواھی دەری ئەو ڕاستیانەیە، ئەوکاتەی مامۆستا مەلا ئەحمد نوسینی بڵاوئەکردەوە  لەسەر چەمک و فیکرو مەفاھیمی ئیسلامی لەگشت بوارەکانی سیاسیی و فەرھەنگیی و کۆمەڵایەتیی و ئەخلاقی ئیسلامیی زۆرێک لەسەرکردەکانی ئەمڕۆی لایەنە ئیسلامیەکان ھەرئاشنای ئیسلامیش نەبوون، بۆیە ڕێزگرتن لەژیان و مێژووی ئەو کەڵەپیاوانە ئەرکی ھەموو مرۆڤێکی ئیسلام پەروەرو نیشتمان پەروەرە .
ئەو کەسانەی جەنابی مامۆستا ئەحمەدیان لەنزیکەوە ناسیبێت زۆرباش ئەزانن کەتەمەنێکی پڕ لەقوربانی دان و نەسرەوتن و ئازارو ئەزیەتی بێ شوماری بردە سەر، ئەو مامۆستایەی کەلەمیانەی مینبەرو دوانگەی مزگەوتەکانەوە بانگەوازی بۆ ڕێگەی ڕاست و دادپەروەری و عەدالەتی کۆمەڵایەتی ئەکرد، ئەو ھەموو وتارو کۆڕو سیمینارو نووسین و کتێبەی کەلەدوای خۆی جێی ھێشتوون، لەچەندین بواری جیاجیای فکریی و سیاسیی و کۆمەڵایەتیی و ئاینیی و کارکردن بۆ ئیسلام جێگە پەنجەیان دیارەو کتێبخانەی کوردیان پێ دەوڵەمەندبووە .
مامۆستا زۆر ڕووخۆش و دەم بەخەندەو خۆشەویست بوو لای قوتابیان و ھاوڕێ و ھاوەڵانیدا بەجۆرێک ھیچ کاتێک ھەست بەماندووبون و  وەرەسما نەدەکرد، لەکاتی سەفەرو کۆبوونەوەو کۆڕو مەجلیسیدا .
ھیچ کاتێک ئامادەنەبوو سازش بکات لەسەربیروباوەڕی ئیسلامیی خۆیی و ئەمەش زۆر بەڕوونی ھەستی پێ دەکرا، لەو کاتانەی کەبەشدار دەبوو لەکۆبوونەوە فەرمیەکاندا، لەگەڵ لایەنەکانی بەرامبەر، ئەمە یەکێکە لەو ھەڵوێست و مەواقیفە بەرزانەی جەنابی مامۆستا ھەرگیز مرۆڤ ناتوانێت لەیادی بکات، مرۆڤی تەنگانەو  ڕۆژانی سەخت بوو، سەرکردەیەکی لێوەشاوەو زاناو حەکیم بوو، بەڕەحم و بەزەیی بوو لەگەڵ پێشمەرگەو  پاسەوانەکانیدا، ھەمیشە لەسەر یەک سفرە نانیان بەیەکەوە دەخوارد، زۆر قینی لەجیاکاریی و فەرق و جیاوازی بوو، کۆچی دوایی زانای  بەرجەستەو بانگخواز درزو کەلێنێکی گەورە  لەکاروانی ڕابوونی ئیسلامی  و زانستخوازیدا دروست ئەکات و پڕکردنەوەی کات و زەمەنێکی دوورو درێژی ئەوێت، ھیوادارم خانەوادە  بەڕێزەکەی جەنابی مامۆستای مەرحوم ھەوڵی جیدی بدەن بۆ ئەوەی یەکێ لەکوڕە بەڕێزەکانی جێگەی باوکیان بگرنەوەو درێژە بەکاروانی زانستخوازیی و بانگەوازی باوکیان بدەن، داواکارم لەخوای پەروەردگار  کەجێگەی جەنابی مامۆستا بەھەشتی پان و بەرین بێت و لەگەڵ پێغەمبەران و زانایان و شەھیدان حەشربکرێت و لەڕۆژی دواییدا تکاکاربێت بۆ ئیماندارو موسوڵمانان، بەئومێدی بەردەوام بوونی قوتابیان و  ھاوڕێیەکانی  لەسەر ڕێبازو کاروانی مامۆستاکەیان .

                                                                                   عبداللە حسن وەرتێ 
                                                                                            ٢ / ١ / ٢٠٠٩ 
                                                                                        ھەولێر

بەروار2020/03/30سەردان 122