کێشەی گەلی کورد لەدیدی مامۆستا مەلا ئەحمەد کاکە مەحممودەوە.

- ئێمە وەک ئەوەى کە موسوڵمانین و لە بازنەیەکى ئیسلامییدا کار دەکەین و دەمانەوێت لەسەر بەرنامەی شەرعی خوا کاربکەین و بڕوانینە هەموو پێشهات و مەسەلەکان، قەزییەی کوردیش بەکێشەیەکی ئیسلامیی سەیر دەکەین و پێمان وایە کورد یەکێ لەو سەدان و هەزاران نەتەوەو گەلانەی دونیایە کەخوا بەرامبەریان دەفەرموێ: (وجعلناكم شعوبا وقبائل لتعارفوا إن أكرمكم عندالله أتقاكم)، کورد نەتەوەیەکە وەک گشت نەتەوەکانی گێتیی و دەبێ هەموو مافێکیان دیاری بکرێت، دەبێ زمان و کاڵاو باڵایان پەسەند بێت، نیشتمان و فەرهەنگ و کەلتوریان ددانی پێدا بنرێت.

- ئێمە بەڵامانەوە ڕەوا نییە هیچ گەل و نەتەوەیەک بچەوسێنرێتەوەو مافی ڕەوای خۆی لێ زەوت بکرێت، چونکە – ئەگەر موسڵمانیش نەبن - وەکو مرۆڤ ڕێزیان هەیەو دەبێ قەدریان بگیردرێت و بەکەم تەماشا نەکرێن، بۆیە ئێمە دەڵێین: یان ئەوەتا نابێت هیچ گەل و نەتەوەیەک لەدونیای ئیسلامەتیدا – نیوە دوورگەی عەرەبیی و دراوسێکان – ناویان لەسەر نەخشەی جوگرافیای سیاسیی هەبێ و هەر وڵاتەی بۆخۆی دەوڵەتێک بێت، یان دەبێ کوردیش بۆخۆی دەوڵەتێک بێت، وەیان دەبێ ناوی هەموو لەسەر نەخشە بسڕێتەوەو هەموویان وشەی (دەوڵەتی ئیسلامیی) کۆیان بکاتەوە، بەڵێ... لەبنەڕەتدا مرۆڤەکان دەبێ گشت برا بن و پێکەوە برایانە دەوڵەت بەرن بەڕێوەو جیاوازی نەبێ لەنێوان هیچ نەتەوەیەکدا، ئیسلامیش وا سەیری ئەم دونیایە دەکات، بەڵام ئێستا کە لەت و پەت بووەو پارچە پارچە کراوەو، هەر پارچەش سیاسەتی وڵاتێک دەیبا بەڕێوە، یان ئەوەتە دەبێ گشت ببنەوە یەک، یان دەبێ هەموو نەتەوەیەک ناوونیشانی خۆی لەسەر نەخشەی جیهانی هەبێ و لەلایەن زلهێزەکانی دونیاوە ددان بە وجودیدا بنرێت.

- خۆ ئەگەر نەکرێت – لەبەر سیاسەتی دونیای ئەمڕۆ – سەربەخۆیی وەرگرێت و دەوڵەتێکی کوردی پێک بهێنرێت، دەکرێ بەشێوەی ویلایات و فیدراڵییەت مافی ڕەوای خۆی بدرێتێ و بەیاساو قانونی فیدراڵییەتی گشتیی جیهان بجوڵێتەوە، سنوورو زمان و بەرهەم و دەرامەتی پارێزراو بێت و خەرج بکرێت بۆ پێویستی دانیشتوانی کوردستان و، پاشانیش لەڕووی شەریعەتی ئیسلامەوە ئەگەر لەپرۆژەکان زیادەی هەبوو، وە لێی دەمایەوە، ئەوسا بدرێتەوە بەحکومەتی مەرکەزی، ئەمیش بەشێوەیەکی دادگەرانە بەسەر هاوڵاتیاندا دابەشى بکات و کەسی لێ بێ بەش نەکات، واتە: لەو دەرامەتە بەشی هەموو شارو گوندەکان بدرێت بەدامەزراندنی هاوڵاتیان، بەچاککردنی جادەو رێگاوبان و بەکردنەوەی نەخۆشخانەو قوتابخانەو مزگەوت و.....هتد بۆیان. لەگەڵ ئەمانەشدا نابێ پێوەری هاوڵاتی بوون ئینتیمای حیزبیی بێت، بەڵکو تەنیاو تەنیا لەدایک بووی ئەوێ بێ، وەیان بەشێوەی ڕەسمیی لەلایەن ئەو دەوڵەتەوە ڕێی پێدرابێت لەو نیشتمانەدا بژی.

- ئێمە لەڕووی بەرنامەی دینی ئیسلامەوە دەڕوانینەوە مافی هەموو مرۆڤێک لەم سەر گۆی زەوییەدا بەوشکانیی و دەریاییەوە، پێویستە لەسەر بنەماکانی ئایەتى: (كان الناس أمة واحدة) تەعامولی لەگەڵ بکرێت، واتە: ئەگەر خیلافەتی ئیسلامیی هەبوو خەمی مرۆڤەکانی گشت دونیا بخوات، بەتایبەتی ئەوانەیان لەژێر ڕکێفی ئەودان، ئیتر زمان و فەرهەنگ و نەتەوەیان هەرچی ببێت، لەبەر ئەوە لەسنوری ئەودان لەهەموو پێداویستییەکانی سیاسیی و کۆمەڵاتیی و ئابوریی ژیانییان بەر پرسە لە دونیاو لەقیامەتدا، هەر لەو ڕوویەوە بوو عومەری کوری خەتتاب  کە لە مەرکەزی دەوڵەتی ئیسلامیی ئەو کاتەوە لەمەدینە دەیگوت: کارژەلەیەک پێی هەڵکەوێت لەبەردێک لەدیجلەو فوراتدا عومەر بەرپرسە، چونکە ئەو چووەتە ژێر پاراستنی باری سیاسیی و کۆمەڵایەتیی و خۆشگوزەرانیی پێکهاتەی ئەو دەوڵەتە، ئیسلام تێی گەیاندبوو لەبن یاسای ((كلكم راع وكلكم مسئول عن رعيته))( صحيح البخاري، كتاب الجمعة، باب الجمعة في القرى والمدن، حديث: ‏867‏.) هەرکەسێک لەناو تەواوی خەڵکانی دەوڵەتەکەیدا برسی بێت، ئەو بەرپرسە، هەر بۆیە لەساڵە نەهاتەکاندا خەلیفەی موسوڵمانان گۆشتی چەوری لەسەر خۆی حەرام کردبوو، هەر بۆیە لەکاتی وشکەساڵیی و گرانیدا یاسای دەستبڕینی دزی ڕاگرت.

- ئێمە پێمان وایە دەرامەت و بەرووبومی وڵات بەپلەی یەکەم حەقی ئەوانەیە دەرامەتەکەی تێدا پەیدا دەکەن، واتە: هەتا هاوڵاتیانی ئەو جێگایە پێویستیان پێی هەبێت، ناڕەوایە بنێردرێ بۆجێگایەکی تر، (عومەری عبدالعزیز)یش ڕەحمەتى خواى لێبێت لەو سەردەمەدا کەزەکاتیان کۆ دەکردەوە، لەو ئەفریقایەدا کەبەدەست گرانیەوە بەگیرهاتووە، عومەریان ئاگادار کرد کە: ئەفریقیا هەژارو بێ نەوایەکی ئەوتۆی تێدا نەماوە کەزەکاتی پێ بشێت، ئایا چی لێ بکرێت.؟! ئەویش لەڕووی فیقهی ئیسلامییەوە فەرمووی: بگەڕێن بزانن کێ قەرزارە، کێ لاوەو ناتوانێ ژن بهێنێت، کێ بەکۆیلە ماوەتەوەو ناتوانێت خۆی ئازاد بکات، بیدەن بەوانە..!
لەم سۆنگەیەوە دەرامەت و بەرووبومی کوردستانیش، بەنەوتەکەی کەرکوکیشەوە، دەبێ بۆ خەڵکی کوردستان و سنووری ئەو خەرج بکرێت، تەنانەت هەتا کوردستان پێویستی بەپرۆژەیەک هەبێت، ڕەوا نییە بدرێت بەحکومەتی مەرکەزیش، چ جای دەوڵەتانی نەیارو زلهێزو داگیرکەر.

ئەمە کورتەو پوختەیەک بوو لەتێروانینی شێخ ئەحمەد کاکە مەحموود بۆ کێشەی کورد و گشت گەلانی دیکە.

وصلى الله وسلم على نبينا محمد وآله.