پرس و راوێژ لەسەر ژنان و زەماوەندو بۆنەكان ؟

نووسین و وەڵامدانەوەی مامۆستا ئەحمەد كاكە مەحمود

وەڵام/
1- خۆ دەرخستنی زاواو بوك پێكەوە لەناو ژناندا دروست نییە، چونكە كاری وا مانای نەمانی شەرمەو، لاسایی كردنەوەی خەڵكانی ئەخلاق ڕووخاوە.
2- جل و بەرگ خواستن یان بەكرێ‌ گرتن هیچ قەیدی نییە.
3- ئاهەنگ گێران لە هۆڵ و هوتێلەكاندا گەلێ‌ جار ئەم خراپانەی لێدەكەوێتەوە:
- ماڵ و سامانێكی تیا خەرج دەكرێ‌ بێ‌ ئەوە پێویست بێت.
- ژن و پیاو تێكەڵ دەبن.
- بردنی زاواو بوك بۆ شوێنێكی بەرزو نیشاندانیان لەناو ژنگەلێكدا – كە ئەوانیش بەجوانترین شێوە خۆیان رازاندووەتەوە – دروست نییە.. دەبێ‌ زاوا لە جێگایەكی تایبەتی پڕ لە حەیاو شەرمدا لەگەڵ بووكێ‌ كۆ ببێتەوە.
4- وێنەگرتن بە هەر ئامێرێك یان بە ڤیدیۆ بۆ ئەوە نیشانی خەڵكانی نامەحرەم و خراپی بدات دروست نییە، پێویستە هەموو موسڵمانێكی ژیرو فامدار لەو جۆرە كردارانە خۆی بپارێزێ‌.
5- هەر ئاهەنگێك بزانرێ‌ كاری خراپ و (منكر)ی تیایە، نابێ‌ موسڵمان تێی بچێت مەگەر بەچوونی ئەو (منكر)ـەكە نەمێنێ‌.
6- ژنان دەتوانن بەم مەرجانە هەڵپەرن:
- لەو جێگایەدا تەنها ژنانی تیابێت.
- ئەوەند نەكرێ‌ بە هەراو سومڕ، كە لە دوورەوە پێیان بزانرێ‌.
- بە شێوەی شەرعیی تەواو خۆی داپۆشێت، واتە: لە كاتی هەڵپەرینەكەدا هیچ جێگایەكی – رێ‌َ پێنەدراوی – دەرنەكەوێ‌.
7- وەڵامدانەوەی دەعوەتی زەماوەند بۆ ژنان بەم مەرجانە دروستە:
- مێرد رازی بێ‌ و مۆڵەتی بدات.
- زەماوەندەكە (منكر)ی تێدا نەبێ‌، یان بە چوونی ئەو نەمێنێ‌، ئەگینە واجب نییە وەڵامدانەوەی.
- گوێ‌ گرتن بۆ گۆرانی ناشیرین و پاشان ژنان پێی هەڵپەرن، كارێكی حەرامە.
8- خۆ گۆرین لەو ژوورانەدا ئامادە كراون بۆ زەماوەند، دەبێ‌ زۆر بە حەیاو بەشەرمەوە بێت، بەتایبەتی نە وەك كامێرای شاراوە دانرا بێت و وێنەیان بگرێ‌.