هەڵگيرسانى جەنگ و ئاژاوە لە دواى وەفاتى پێغەمبەر.!

وەڵامى گومانى هەڵگيرسانى جەنگ و ئاژاوە لە دواى وەفاتى پێغەمبەر.!


ئەو دەزگایەی (سامان نووری) كاری تیا دەكات دەڵێت: (هەر لە دوای مردنی محمد شەڕو دژایەتی كەوتە نێوان ڕابەرانی ئایینەوە لەسەر وەرگرتنی دەسەڵات و بوون بە خەلیفە).

 بەڵێ‌... ئەمە باسێكی ئاڵۆزو گران و قورسە، چونكە هۆیەكانی زۆر زۆرن و لەم نامیلەكەیەداو بەم سەرپێیەوە وەڵامێك بۆ ڕەخنەیەكی ئاوا، زۆری دەوێت، بەڵام ئێمە بە كورتەیەك چەند هۆیەكی سیاسی دێنین كە بوونە هۆی ئەو ئاژاوەو گیروگرفتانە – كە بە داخەوە ئێستا كۆمەڵێكی فورصەت گیــر، كت و مت دەیخەنە ڕوو و كێشەیەكی ئاواش وەڵامدانەوەی هەر ئاوا ئاسان نییە – دەتوانین ئەم هۆیانە كورت بكەینەوە لەم خاڵانەدا:

1. ئەو جوولەكانەی لە (مەدینە)دا دەركران بەهۆی چەندیین جار خیانەتییانەوە.
2. ئیمپراتۆرییەتی ڕۆمانییەكان... كە ئەو شــــەوكەت و دەسەڵاتەیان لە دەست داو خـۆی بە ڕیسوا دەزانی.
3. ئیمپـراتۆرییەتی فارسەكان... كە زۆربەی بەرژەوەندییەكان لەدەستدا.
4. لەناویشەوە جوولەكەكان درێغییان نە دەكرد..! هەر بۆیەش گەورەترین خیانەتكارییان (عەبدوڵڵای كوڕی سەبە‌ء) لە (یەمەن)ـەوە نێررایە ناو شاری مەدینەوە بە ڕوواڵەت موسڵمان بوو، بەڵام سپاردەكەی زۆر گەورەتر بوو لەوە پێی سپێررا بوو.. هەرچەند دەتوانێ‌ ئیسلامەتی خۆی جوان بكات لای ئەم و ئەو، بۆ ئەوەی كاتێ‌ هەستا بە داگیــرساندنی (فەتیلە)ی شەڕەكە بڕوای پێ‌ بكرێ‌، هەرچی پێ‌ سپێررابوو بەجێی هێنا.. ئینجا كەوتە پیادەی پیلانەكەی.. جا بۆ ئەوەی بە زوویی پیلانەكەی بێتە بەرهەم.. هەستا لە (خەلیفە)وە دەستی پێ‌ كرد، دەستی كرد بە بڵاوكردنەوەی ناشەرعییەتی خەلافەتی (عوسمان)، بەڵام لەم ڕێگەیەوە كە بڵێت: (ان لكل نبـي وصیا، وإن (علیا) وصی (الرسول)، ولقد وثب (عثمان) علی أمر هذه الأمە، وأخذ الحق من صاحبه...!!).  
ئێجگار ئاگرەكەی خۆش دەكرد بەهێنانەوەی هەندێ‌ فەرموودە، وەك: ((من كنت مولاه فعلي مولاه...)). (صحیح، صححه الألبانی فی صحیح الجامع، برقم: 6523). یان: ((اللهم وال من والاه، و عاد من عاداه)). (صحیح، صححه الألبانی فی السلسة الصحیحة، برقم: 1750).

 هەرچەند جەنابی ئیمام عەلی كاتێ‌ ئەو ژەهرەی دەبیست هەڕەشەی لێ‌ دەكردو موسڵمانانی هۆشیار دەكردەوە لەگەڵ ئەوەیشدا (كوڕەكەی سەبە‌و)یش نەوەستا لە ئەنجامدانی نەخشەكەی... ئەوە بوو بە فەتیلەی گێرە شێوێنییەكەیەوە ساڵی (32 كۆچی / 653 زایینی)، بەرەو بەصرە، پاشان (كووفــــە)، ئینجا (شام)، دواتر (میصر) ڕۆیشت، لەو سەردانەیدا هەركەسێكی بە دڵگران بزانایە پەیوەندی پێوە دەكردو دەیان و سەدان قسەی بێ‌ بناغەو ناوەڕۆكی بۆ دەكرد دژ بە موسڵمانان و دەسەڵاتیان.. وە بەرنامەی كارەكەیشی بۆ داڕشتن بە تایبەت گرنگیدا بەم چەند خاڵەیە: (تظاهروا بالأمر بالمعروف والنهي عن المنكر، تستمیلوا الناس إلیكم... وابدأوا بالطعن في أمرا‌وكم... وقولوا للناس ان (عثمان) قد أخذ الخلافة بغیر الحق.... و ان (علیا) وصی رسول الله، فانهضوا وردوا الحق الی صاحبه...)..!!

 یەكەم: جل و بەرگی تەقوا لەبەر بكەن و درووشمی فەرمان بە چاكەو ڕێگری لە خراپە هەڵ بگـرن..!!

 دووەم: هەوڵ بدەن سومعەی كاربەدەستەكان بشكێنن و چەند خاڵێكیان لەسەر كۆبكەنەوە (ڕابواردن و تەرفە و خۆشگوزەرانی و، خزمە خزمێنە...هتد).

سێیەم: یەكەمجار لە سەرەكەیەوە دەست پێ‌ بكەن (واتە: لە پێشەوا (عوسمان)ــەوە.
 بەڵێ‌.. حەمڵەكەی دەست پێكرد، شەوو ڕۆژ لە پەیوەندیكردن نە دەوەستا، بەتایبەت ئەو (عەشیــرەت)انەی سەركردەكانیان لەلایەن پێشەوا (عوسمان)ەوە لەكار خرابوون..! بەڵێ‌ چاو و ڕاو دیعایەكانی (كوڕەكەی سەبە‌ء) بە ئەنجام گەیشت، لە هەردوو ویلایەتەكاندا خەڵكێكی ورووژان دژی (عوسمان) و دەوڵەتەكەی.

ئەمە بوو هۆی سەرەكی ئەو ئاژاوەیە لەنێوان موسڵماناندا بەرپا كرا... موسڵمانەكان بە دڵ پاكی خۆیان و، هەتیوەكەی (سەبە‌ء)یش بەو هەموو ڕق و كینەوە توانی ڕۆژی ڕووناك بكات بە شەوە زەنـگ، توانی بەو شێوە ئاڵۆزی بكات كە هەرچەند لەلایەن خەمخـۆرانی ئیسلامەوە هەوڵ درا، بەڵام ئاگرەكەیان بۆ نەكوژایەوە.. تا وای لێ‌ هات هەموو وڵات و جێگاو، بگرە هەموو بنەماڵەو خێزانێكی گـرتـەوە..!

 پاشان سەریشی كێشا بۆ جەنگەكانی (صفین) و (جەمەل) و...هتد. كەوابوو كێشەكە وەك كەوا سوورانی بەر لەشكر دەڵێن: (لەسەر وەرگرتنی دەسەڵات بوو...) وابوو... بەڵكو ئەو پیلان و فرت و فێڵە بوو كە زۆر شەیتانانە ئاگرەكەی بۆ خۆش كردن و ڕقی هەموو جوولەكەو ئیمپراتۆرییەتی (فارس) و (ڕۆم) و هەر خەڵكێكی تریش كە بە هاتنی ئیسلام بەرژەوەندی نەمابوو، هەمووی خستە سەریەك و پارەو ئیمكانیاتێكی زۆری تیا خەرج كرد ئەوجا ئەو بەرهەمە ڕەشەی هێنا....!!

 ئێستایش ئێوە – ئەی نەوەكانی عەبدوڵڵای كوڕی سەبە‌و – دەستی باڵاتان هەیە لە گێرە شێوێنی و هەڵگیرسانەوەی فتیلەی ئاژاوەو جەنگ و نا ئاسایی بەرپاكردن لە وڵاتدا... چونكە هەموو كەسێك دەزانێ‌ كە ئێوەیش (ماركسییەت، یا شیوعییەت) بەچكەی (سایۆنیزم)ەو لە جوولەكەكانەوە سەرچاوەیان گرتووە، هەر بۆیەش لە هەر جێگایەكدا تۆزقاڵـەیەك دەسەڵاتتان بـووبێت سەدان و هەزاران مزگەوتتان ڕووخاندووەو كردووتانە بە (تەویلە)و تیاترۆخانەو جێگەی سووڕدان و سەما، جگە لە سووتاندنی ملیۆنەها قورئان و ئەشكەنجەدانی هەزاران هەزار لاوو پیری خواناس..!

 ببێ‌ و نەبێ‌ ئەو كارە لە كاری جوولەكەكان دەچێت، چونكە تا ئێستایش زۆربەی لێپرسراوی (ماركسیزم)ەكان جوولەكەكانن، وا دەزانم بێ‌ لێكۆڵینەوە خۆتان ئەم ڕاستییە دەسەلمێنن، بۆیە دەڵێــــن: (الشیوعیة ولیدة الصهیونیة). وەك باوی خۆیان – كە دەبێ‌ لە هەموو نووسین و وتارێكدا باسی ئافرەت بە ئاڵۆز بێنن و مەسەلەكە لە خوشكان چەواشە بكەن و دەستەیەكیش لەم و لەو گوێیان بۆ بگرێ‌ – ئەوەتە دەڵێن: لە ئایەتی (223)ی سوورەتی (البقرة)دا هاتووە كە: ژن كێڵگەیەكی بەرهەم هێنانەو پیاو بە ئارەزووی خۆیەتی چۆن مامەڵەی لەگەڵ بكات: (نِسَاؤُكُمْ حَرْثٌ لَكُمْ فَأْتُوا حَرْثَكُمْ أَنَّى شِئْتُمْ ...) (البقرة: ٢٢٣).

بەروار2020/04/04سەردان 261