2- پرس و راوێژ سەبارەت بە خۆ ششتنى ئافرەتان.؟

نووسین و وەڵامدانەوەی شێخ ئەحمەد کاکە مەحموود

وەڵام/

1- لەکاتى غوسڵى حەیزو زەیسانیدا، هەڵوەشانەوەى (پەلکە)ى ژنان پێویست نییە، ئەگەرچى هەڵوەشاندنەوەى باشترە.
2- ئەگەر ژنێک غوسڵى (جەنابەت)ى لەسەر بوو، دەبێ بۆ غوسڵ ئاو بگاتە بنى تەواوى مووى سەرى.
3- ئەگەر ژنێک (ئیحتیلام)ى بوو، کەچى پاش بە خەبەر هاتنەوە، هیچ شتێکى نەدیت، غوسڵى ناکەوێتە سەر، خۆ ئەگەر تەڕایى، واتە: بە جلەکانیەوە (مەنیى) دیت دەبێ خۆى بشۆرێت.
4- بەهەر هۆیەک (مەنیى) بێتە دەر، ئەگەرچى بە جیماعیش نەبێ، غوسڵ واجب دەبێ.
5- پەنجە کردن بە (فەرج) دا، (ژنەکە پەنجەى خۆى، یان هى کەسێکى تر) لەبەر نەخۆشیى، یان لەبەر هەرشتێ، بەوە غوسڵ واجب نابێت، بەڵکو تەنها دەست نوێژى دەوێت.
6- بە شک و دوو دڵى، غوسڵ واجب نابێت.
7- کەسێکى لەشگران، دەتوانێ بێ دەستنوێژ بخەوێت، بەڵام دەستنوێژ بگرێ ئەوسا بخەوێتەوە، باشترە بۆى.
8- بۆ چەند غوسڵێک، یەک خۆشتن بەسە، بۆ نموونە: (غوسڵى حەیزو زەیسانیى کەوتە سەر) دەتوانێ بە نییەتى هەمووانەوە یەک غوسڵ بکات.
9- کەسێک بە نییەتى لەشگرانیەوە خۆى شۆریی، بەو خۆشۆرینە دەستنوێژیشى دادەمەزرێ، ئەگەرچى چاک وایە بەر لە خۆشۆرین دەستنوێژ هەڵبگرێ و پاشان خۆى بشۆرێت، دیارە بۆ غوسڵى حەیزو زەیسانییش هەروایە.
10- ئەگەر یەکجار ئاو کرا بە تەواوى لاشەدا بە نییەتى غوسڵ، وە هەمووی لاشە تەڕ بوو، ئەگەرچى بە (رەشاشە)یش بێت، غوسڵ دێت.
11- بەکار هێنانى هەموو جۆرەکانى (شامپۆ) بۆ خۆ شۆرین دروستە.
12- ژنان لەکاتى غوسڵدا سێ جار ئاو بکەن بەسەریاندا، ئیتر پێویست ناکات (پەلکە) هەڵوەشێننەوە.
13- ئەگەر پاش خۆشۆرین، کەمێک (مەنیى) لە عەورەتیەوە دەرچوو، بەوە غوسڵەکەى هەڵناوەشێتەوە، مەگەر سەر لەنوێ خۆشیى پێگەشتبێت.
14- ژنان دەتوانن غوسڵى حەیز، یان غوسڵى لەشگرانى، دوا بخەن بۆ دواى بانگى بەیانیى، بەڵام نابێ دواى بخەن بۆ پاش هەڵهاتنى خۆرو نوێژەکەى بەیانیان بچێت.
15- لەسەرەتاى غوسڵەوە (بسم الله) دەکرێ، وەپاش لێبوونەوەش گوتنى ئەم زیکرە سوننەتە: ((أشهد أن لا إله إلا ألله وحده لا شريك له، و أشهد أن محمدا عبده و رسوله، اللهم اجعلنى من التوابين واجعلنى من المتطهرين)).
تێبيينى: (بۆ زیکرى دواى خۆ شۆردن هیج جۆرە فەرمودەیەک نەهاتووە، جگە لەم فەرموودەی دواى دەستنوێژە نەبێ کە ئیمامى موسلیم لە بابی پاکژیدا بە ژمارە 371 گێراویەتیەوە: (أشهد أن لا إله إلا الله وحده لاشريك له، وأشهد أن محمدا عبده ورسوله إِلَّا فُتِحَتْ لَهُ أَبْوَابُ اَلْجَنَّةِ) وە ئەو زیادەش کە دەفەرموێ: (اللهم اجعلني من التوابين واجعلني من المتطهرين) ئیمامى تیرمیزى هێناویەتیى و لە سەنەدەکەیدا لاوازى هەیەو زانایانى کۆن و نوێی فەرموودە، قسەیان لەسەرى هەیە).


والله أعلم

ئەحمەد كاكە مەحموود