هه‌ر به‌ ته‌نیا ڕیشت ڕه‌مز بوو !

ئاری‌ مه‌لا عبداللتیف بامۆكی

ببینن كه‌سه‌كانم ببینن چۆن تاڵ به‌ تاڵی‌ ڕیشی‌ ئه‌و كه‌ڵه‌ مێردو سه‌ركرده‌ به‌ ئه‌مه‌كه‌ ڕیزیان به‌ستووه‌و بۆ قیامه‌ت رێ‌ ئه‌كه‌ن، ئێوه‌ ببینن بزانن ئه‌و ڕوومه‌ت و ته‌وێڵه‌ هه‌ر له‌ نورستانی‌ خودا ناچێ‌؟ ده‌ ببینن بزانن ڕیشی‌ له‌ ڕیشی‌ عومه‌رو عه‌مامه‌كه‌ی‌ له‌وه‌ی‌ ئه‌بوبه‌كر ناچێ‌؟ ببینن و بزانن ئه‌م سه‌ركرده‌یه‌ ڕه‌نگ و ڕوخساری‌ له‌و سه‌حابه‌و پیاوچاك و كه‌سایه‌تییه‌ خوا ویستانه‌ی‌ مێژووی‌ دووری‌ ئیسلام ناچێ‌، كه‌سه‌ر له‌به‌ری‌ موسوڵمانان هه‌تا قیامه‌ت شانازی‌ پێوه‌ ئه‌كه‌ن؟ ئێوه‌ هه‌میشه‌ بڕوانن و ببینن بزانن هه‌ر به‌ته‌نیا ڕیشی‌ مامۆستا به‌س نییه‌ بۆ ئه‌وه‌ی‌ كه‌ بزانین قیامه‌ت چه‌ند نزیكه‌و مردنی‌ ئه‌م كه‌سایه‌تییه‌ به‌س نییه‌ بۆ ئه‌وه‌ی‌ كه‌ بزانین ئه‌م دنیایه‌ چ بێ‌ ده‌ربه‌سته‌؟
نه‌ خانوو نه‌ ڤێلا نه‌ پارك نه‌ پاره‌ نه‌ سامان نه‌ عه‌شیره‌ت نه‌ حیزب كوا ده‌گه‌نه‌ فریای‌ مرۆڤ، جگه‌ له‌و عه‌قیده‌و ئیمان و ته‌قوایه‌ی‌ كه‌ له‌دڵی‌ یه‌كێكی‌ وه‌كو مامۆستادا پرشنگ ئه‌دا؟
سڵاو سه‌ركرده‌ی‌ بێ‌ ده‌نگ و بزوێنه‌ر، ده‌بێ‌ دوای‌ كۆچت شه‌وێ‌ په‌یامێك بنێریت و پێمان بڵێیت له‌پاش خۆت چی‌ بكه‌ین و چۆن خزمه‌تی‌ بزووتنه‌وه‌ بكه‌ین تا بیگه‌یه‌نینه‌ لوتكه‌ی‌ له‌ خه‌مڕه‌خسین.