ئایا نەشتەرگەرى جوانکاریی (عملیات التجمیل) دروستە.؟

وەڵام: لە باسەکانی ڕابوردوودا گوتمان ژنان دەتوانن خەنەو ڕەنگ و بۆیە و بۆنخۆشیی بەکار بێنن، لەم باسەشدا لەوە دەدوێین ئاخۆ دەتوانن لەڕووی شەریعەتی ئیسلامەوە، نەشتەرگەری بکەن بۆ لابردنی یان بۆ ڕێککردنی هەر ئەندامێکی جەستەیان.؟

زاناکان لەم مەسەلەیەشدا قسەو باسێکی زۆریان هەیە، بەڵام هەرچەند سەیری ڕوحی ئیسلام بکرێ کە چەندە گرنگی دەدات بە مرۆڤ  و بەجوانی مرۆڤ، دەزانرێ کە ئەو جۆرە دەسکاریانە بە نەشتەرگەریی و هەر هۆکارێکی تر بۆ ژن و پیاو حەڵاڵەو رێى پێدەدرێ، بەبەڵگەی ئەوە کە پێغەمبەر ﷺ فەرمانی دا بە (عرفجة بن أسعد) کاتێ لەڕوداوێکدا لووتی بڕابوو، بچێت لە ئاڵتوون دروستی بکاتەوە.
ئیمامی (خەتابی) لە ڕاڤەی ئەم فەرموودەدا دەڵێ: دەشتوانن ئەندازەیەکی کەم زێڕ بەکاربێنن بۆ ئەو جۆرە شتانە دێنە پێش و پەیدا دەبن، لە کتێبی (المجموع)دا هاتووە: (يجوز لمن ذهب أنفه أو سنه أو أنملته، أن يتخذ مكانها ذهباً سواء أمكنه فضة وغيرها أم لا). کەوابوو دەسکاری دەم و چاو و ڕوخسارو، ڕێککردنی لووت  و هەر ئەندامێکی تری لەش، کارێکی باش و پەسەندە لەشەریعەتی ئیسلامدا، وە بە (تغییر خلق الله) دانانرێت. 

والله أعلم.

ئەحمەد كاكە مەحموود