دەستدان لە قورئان بەبێ دەستنوێژ.؟
(لاَ يَمَسُّهُ إِلاَّ الْمُطَهَّرُونَ) کەس دەستى لێنادات، فریشتەکان نەبێت، ئەم ئایەتە وەڵامێکە بۆ ئەو بتپەرستانەى پێیان وابوو قورئان شەیاتین دەیهێنێ بۆ پێغەمبەر، نەک فریشتە، (سەید قوتب) دەڵێ: ئەم مانایە ئاشکراو ڕوونترە بۆ مانا دانەوەى
(لاَ يَمَسُّهُ إِلاَّ الْمُطَهَّرُونَ)، چونکە بیژەى (لا) بۆ (نەفى)یە، نەک بۆ (نەهى)، ئەوەتا لە ڕووى زەویدا هەموو کەسێک دەستى تێوە دەدات: چاک و خراپ، بروادارو بێ بڕوا، ئەگەر نەهى بووبا دەبوو هیچ کەسێکى تر نەیتوانیبا دەستى تێوە بدات، ئایەتى:
(تَنزِيلٌ مِنْ رَبِّ الْعَالَمِينَ)یش پشتگیرى ئەو مەبەستە دەکات. (تَنزِيلٌ مِنْ رَبِّ الْعَالَمِينَ) لە لایەن پەروەردگارى جیهانەکانەوە دابەزێنراوەتە خوارەوە. دەستەیەک لە زانایان وەک (عەلى کوڕى ئەبوتالیب و ئیبنى مەسعوود و سەعد و، کۆمەڵێکیش لە پێشەواکان (مالیک و شافیعى) پێیان وایە بێ دەست نوێژ نابێ دەست بە قورئانەوە بدرێت، دەستەیەکى تریش وەک (ئیبن عەبباس و شەعبیى و ئەبووحەنیفە)و هەندێکیتر لە زانایان دەڵێن: دەستدان بە قورئانەوە بێ دەستنوێژ ڕەوایە. (ئیبن کەسیر)یش بۆ بەڵگەى ئەوە کە ڕەوا نیە بێ دەست نوێژ دەست بدرێت بە قورئانەوە دوو فەرموودەى هێناوە، بەڵام دواتر دەڵێ: (وفي إسناد كل منهما نظر، والله أعلم) واتە: لە سەنەدى هەردوو فەرمودەکاندا تێبینى هەیە!! کەوابوو ڕەوایە دەست دان لە قورئان بەبێ دەست نوێژ، هەرچەند جوانترو باشتر وایە دەستنوێژت هەبێ.!
والله أعلم.
ئەحمەد كاكە مەحموود
