(إِذْ قَالَ اللَّهُ يَا عِيسَىٰ إِنِّي مُتَوَفِّيكَ) ئەوەبوو فەرمووى: ئەى عیسا! بەراستیى من دەتبەمەوە بۆلاى خۆم و، هەتا رۆژێ دەتگەیەنمە کاتى دیارییکراوى ئاسایى بۆ ژیانت دەمێنى و، ئەوسا دەتمرێنم، واتە: ئێستا بەر لەهاتنى کۆتایى ژیانت ناهێڵم ئەوانە بتکوژن و بمریت ( ورافعك إلي) و لەلاى خۆیشم جێى بەرزت دەبێ و، سەرت دەخەم بۆ ئاسمان بۆلاى خۆم. زانایان لە شێوەى بەرزکردنەوەى عیسادا دوو قسەیان هەیە:

1- دەڵێن: لەم ئایەتەدا پاش و  پێش هەیەو، لە بنەڕەتدا بەم جۆرەیە: (إني رافعك إلي ومتوفيك) واتە: لە پێشدا بەرزت دەکەمەوە بۆلاى خۆم، ئەوساکە هاتیتە خوارەوە دەتمرێنم.

2- دەڵێن: ئایەتەکە هیچ ئاڵوگۆڕێکى تێدا نییەو، هەروەک ئێستایەو، ماناشى ئەوەیە کە دەتمرێنم، ئەوجا بەرزت دەکەمەوە بۆلاى خۆم.
(سەید قوتب) دەڵێ: عیسا چۆن مردوو، چۆن بەرزبوویەوە.؟ ئەم جۆرە شتانە لەکارە (غەیبیات) و نادیارەکانن، هەرچەند (تەبەریى) دەڵێت: مەبەست ئەوەیە کە خوا عیساى بەزیندوویى بۆلاى خۆى بەرزکردۆتەوە، چونکە ئەو فەرمودانەیش کە یەکدەنگن بۆگەڕانەوەو هاتنەوەی عیسا لە ئاخر زەماندا بۆسەر زەویى، گشت (متواتر)ن، جاهەر بۆ پتر زانیاریی لەبارەی (عیسا)وە دەڵێم: عەقیدەی ئەهلی سوننەت و جەماعەت ئەوەیە کە: (عیسا) هەر بەزیندوویی "بەفەرمانى خوا" بەرزکراوەتەوە بۆ ئاسمان بۆلاى خۆى، جا بۆ دوایی "پێشهاتنی رۆژى قیامەت" دێتە خوارێ و، بەشەریعەتی محمد ﷺ حوکم و بڕیار دەداو کار دەکا، پاشان دەجال دەکوژێ و رووى سەر زەویی پڕ دەبێ لە دادو عەدالەت و فەڕو بەرەکەت، ئیتر لەگەڵ (الطائفة المنصورة)دا کە لەپێناوى حەقدا دەجەنگێن جیهادى خۆى دەکا و لەپشت سەر ئەمیرەکەیانەوە نوێژ دەکا، ئەمەیە کورتەى ڕاو بۆ چوونمان لەم مەسەلەدا ئیتر خوای گەورەش باشتر دەزانێ.

والله أعلم

ئەحمەد كاكە مەحموود