گرنگی کۆنفرانسی ھەڵەبجەو بەردەوامبوون لەو رێڕەوە...!

رۆژی چوارشەم و پێنجشەم بەرواری ٢٧ و ٢٨ ی ٣ / ٢٠١٨ لە شاری ھەڵەبجە بەشداریمان کرد لە کۆنفرانسی (دیدی دروست بۆ فەرموودە- پێگەو کارپێکردنی)، لێرەدا وێرای دەستخۆشی و ماندوو نەبوونی زۆرم بۆ برایانم لە ئینستتیوتی ژیار..

- لە راستیدا زۆر زووتر چاوەڕوانی لەو جۆرە کۆنگرەو بەرگریکردنە بووین لە فەرموودەو پێشەوایانی فەرموودە ، چونکە ئەوەی ئێمە لە نزیکەوە لە کۆڕو سیمینارو ھەروەھا سۆشیال میدیا ئاگاداری ئەو رەوت و بۆچوونانەین کە زۆر بێ شەرمانە رەخنە لە زۆرێک فەرمودەی سەرەوەری مرۆڤایەتی دەگیرێ و زۆر بە جورئەتەوە دەیان و سەدان فەرموودەی راست و دروستی پێغەمبەری سەروەرمان رەت دەکەنەوە ، بێجگە لە سوکایەتی و دژایەتی کردنێکی زۆر ڕوون و ئاشکرایانە بۆ خودی ئیمامی بوخاری کە لە ئێستادا زوومی رەخنەگران زیاتر لەسەر ئیمامی بوخارییە رەحمەتی خوای لێبێت..
- سازدانی کۆنگرەی (دیدی دروست بۆ فەرموودە- پێگەو کارپێکردنی) لە ئێستاداو بەتایبەت لە شاری ھەڵەبجەی شەھیدان بەو قورساییەوە لە ھەموو ڕووەکانەوە مانایەکی گرنگ و بەرچاوی بەخشیە شارەکە ، چونکە بەداخەوە زیاتر و ڕوونتر ئەو جۆرە فکرو ھزرانە (بەناو قورئانی و ڕەتکردنەوەی فەرموودە) سەرچاوەکەی لەو شارەوە سەرچاوەی گرت و ھەر لەوێشەوە بڵاوەی کرد.!
- پاشان ئەوەی سەیرەو جێی ئەسەفە.. ئەم رەوتەی کە ئێستا ھەیە (بەناو قورئانی)، زیاتر لە ناو بازنەی کاری ئیسلامی و بگرە حزبایەتی ئیسلامی خۆیان دەبیننەوەو ھەر لە نزیکان و تەنانەت لە قیادەی کاروانی رابوونی ئیسلامیدان و بەداخەوە بانگەشەی ئەم رەتکردنەوەی فەرموودە لەوانەوە زیاتر سەرچاوەی گرتووەو دەگرێ ، جارێکیان خۆم لە کۆرێکدا بووم کە بە ئاشکرا ئەو گومانە بڵاو دەکرایەوە کە گوایا ھاوەڵی بەرێز ئەبوو ھورەیرە (رەزای خوای لەسەر بێت) تەنھا ٦ تا ١٢ فەرمودەی راست و دروستی ھەیە.!
- داوام وایە لە برایانم لە ئینستتیۆی ژیارو ھەر لایەن و سەنتەرو رێکخراوێکی تری فکری ، کە زۆر بوێرانە دەرگای موناقەشەو چەلەحانێ بکەنەوە لەگەڵ رەوتی نەیارو ھەر لایەن و کەسانێکی دیکە کە دەرگاری گومان لەو ڕووەوە دەکەنەوە بەتایبەت لە سۆشیاڵ میدیا، چونکە بەراستی ئەوەی ئێمە دەیبینین و دەیبیسین لە نەیارانی سوونەت لە ھێرشی نارەواو بڵاوکردنەوە سەدان گومان بە عەقڵی بچوکی ئەوان لەسەر فەرمودەو ئیمامی بوخاری بەتایبەت ، جێگای سەرسامییە.!
- بەرگریکردن لە فەرموودەو پێشەوایانی فەرموودە لە ئێستادا دەبێ کاری سەرەکی بانگخوازان و مامۆستایانی ئایینی و پاشان رێکخراوەکان بێت ، چونکە لە راستیدا بە ناراستەوخۆییش کەناڵەکانی راگەیاندنی سەر بەدەسەڵاتیش جارجارە خەڵکی نەخوێندەوارو نەناسراو دێننە سەر شاشەو ھەرجارەو گومانێک فڕێ دەدەن.!
لە کۆتاییدا دووبارەو سەدبارە دەستخۆشی و پێزانینم بۆ برایانی ھەڵسوڕاوانی ئامادەکاری کۆنگرەی ھەڵەبجە ھەیە کە بەراستی وەھا کۆنگرەیەک بەو ژمارە زۆرەوە لە زانایان و دکتۆر و پسپۆران و شارەزایان زۆر زۆر جێی دڵخۆشی بوو.. خوای گەورە لە ئێوەو لە ئێمەشی وەرگرتبێت.

خوای گەورە بمانکاتە ئەداتی قەدەری خۆی بۆ سەرخستنی پەیامەکەی. ئامین.

www.ahmadkaka.org || www.dangiislam.org