جەنابی مامۆستا مەلا عبدالقادری توحیدی کۆچی دوایی کرد

پرسەنامەیەک بۆ بنەماڵەو خانەوادەی جەنابی مامۆستا

مامۆستا مەلا عبدالقادری توحیدی لە غەریبیدا بە غەریبی کۆچی دوایی کرد..!

رۆژی ١ / ١١ / ٢٠١٧ی زایینی لە شاری ھەولێر مامۆستا مەلا عبدالقادر توحیدی دوای تەمەنێک لە غوربەت و دووری لە وڵاتی زێدو نیشتمانی خۆی (کوردستانی رۆژھەڵات)، بەنەخۆشی کۆچیی دوایی کرد.. خوای گەورە پلەی شەھیدی پێ ببەخشێت و لەگەڵ گەورە پیاوانی ئوممەتی ئیسلام حەشری بکات.. ئامین
جەنابی مامۆستا توحیدی ھاورێ و ھاوخەباتی مامۆستا ناودارو ناسراوەکانی کوردستانی رۆژھەڵات بووە، وەک: مامۆستا رەبیعی و ئەحمەدی موفیتزادە و ناسری سوبحانی و دەیان زانای گەورەی تر.. خوا لێیان خۆش بێ و دەرەجەیان بەرز بکاتەوە.. وە مامۆستا تەوحیدی زۆر بوێرانە ئەو پێشنیارەی بۆ یەکەمجار لە مێژووی کاری ئیسلامیی لە کوردستانی رۆژھەڵات خستە روو.. وە بە عەمەلی چەکی جیھادی کردە شان و بزووتنەوەی ئیسلامیی راگەیاند.. ھەر چەند مامۆستا لەو کارەیدا تەنھابوو، وە بەتەنھایی بەجێیان ھێڵا..!! بەڵام گرنگ ئەوەبوو مامۆستا ھەڵوێست و مەوقیفی خۆی بۆ خودا و پاشان گەلەکەی راگەیاند... خوای گەورە لێی خۆش بێ و ئەو ماندوو بوونەی لێ وەربگرێ.. فطوبی للغرباء..
مامۆستا لەگەڵ ئەوەی وڵاتی خۆی بەجێ ھێڵا و کۆچی کرد بەرەو کوردستانی باشوورو ئەو کۆڵە قورسەی خستە سەرشانی و ئیعلانی ئەو بزووتنەوەیەی کرد، بەڵام بەردەوام قەڵەمەکەی دەستی دانەناو تا رۆژی وەفاتی ھەر خەریکی پێگەیاند و تێگەیاندنی لاوو گەنجانی وڵات بوو..
وە کۆتا بەرھەم و خیتامی ژیانی تەفسیری قورئان بوو بە زمانی شیرینی کوردی بەناوی (تەفسیری تەوحید) کە ئێستا لە کتێبخانەکانی کوردستاندایە..
داواکارین لە خوای باڵا دەست جیھاد و ماندوو بونی لێ وەرگرتبێت و پاداشتی بە بەھەشتە نەبراوەکەی بداتەوە.. وانا للە وانا الیە راجعون.
بەناوی بنەماڵەو خانەوادەی مامۆستا ئەحمەد کاکە مەحموودەوە پرسەو سەرەخۆشی خۆمان ئاراستەی بنەماڵەی مامۆستای کۆچکردوو دەکەین و خوای پەروەردگار لە گوناە و تاوانەکانی ببورێ و ماندوو بوون و جیھاد و تێکۆشانی لێ وەر گرتبێت..
سلام علیک یوم ولدت، ویوم مت، ویوم تبعث حیا..

عیرفان ئەحمەد کاکە مەحموود
لەبری بنەماڵەو خانەوادەی شێخ ئەحمەد کاکە مەحموود

٢ / ١١ / ٢٠١٧ - سلێمانی - www.ahmadkaka.org