لە بیرەوەری 18 ساڵەی وەفاتی جەنابی مامۆستا مەلا عوسمان عبدالعزیز دا

ھەزار ئەفسوس جەنابی شێخ ..!

ئەمرۆ 18 ساڵ بەسەر وەفاتی پیاوی مەیدانی تەقواو زانست و بانگەوازو ھیجرەت و جیھاد تێ دەپەرێت، خوای پەروەردگار دەرەجاتی عالی بکات و لە فردوس ئەعلا جێ نشینی بکات..
ئەوەی زەرورە بوترێ وەک وەفایەک بۆ ئەم قارەمانەی کە ھەموو تەمەنی بۆ خزمەت بە سەرکەوتنی وشەی خواو پاراستنی موقەدەساتی ئیسلام بوو.. ئەوەیە کە:
جەنابی مامۆستا مەلا عوسمان ھەتا لە ژیاندا بوو پیش بزووتنەوەو دوای راگەیاندنی بزووتنەوەش رەمزی وەحدەت و برایەتی پاراستنی یەکریزیی صەفی موسوڵمانان بوو..!
باشە بۆ ئێستا دوای 18 ساڵ لە وەفاتی ئەم زانا گەورەیە کەسێک نەبوو ببێتە جێی دڵخۆشیی و راستکردنەوەی ماڵە رووخاوەی ئیسلامییەکانی کوردستان و ھەر ھیچ نەبێ بۆ چەند سالێکی کەمیش بێت بتوانێت ئەو دەورو کاریگەرییە ببینێت و لەم شپرزەیی و بێ نازیی و ماڵ جیاییە رزگارمان بکات و ئاھێک پێش مردنمان ھەڵمژین بە گەیشتنی ئاواتی یەکریزیی و کاری ھاوبەشی نێوان ئیسلامییەکانی کوردستان..!
باشە موسوڵمانانی کوردستان بە حیزبیی و نا حیزبیەوە لە پێناو ماڵ جیایی ئیسلامییەکان چ باجێک ماوە نەیدەن .؟!! مەگەر سەدان گەنج و پیاوانی داعیی و ھەڵگرانی پەیامی خوایی توندی زیندانەکان نەکران.؟!! 
مەگەر تەنانەتی سەرکردەکانیش توندی زیندان نەکران و ئیھانەو ھەزار تۆمەت نەخرایە پاڵیان.؟!
مەگەر ئەمریکا و ھاوکارانی دەیان گەنجی خوێن گەرمیان لە خوێنی خۆیان نەگەوزان بەبێ ھیچ ھۆکارێک و لە گەرمه ى شیرینی خەودا درانە بەرناپاڵمی ئەمریکای دیموکراتی خواز..؟!!
مەگەر لە بازگەکاندا سەرکردەکان بە بەرچاوی کامێراکانەوە تیرۆرو نەکوژران..؟!
مەگەر سەدان و ھەزاران گەنج و پیاوانی ماندووی ساحە نەچوونەوە ماڵەوەو لە بێ نازی ملی خۆیان کەچ نه کرد تا خوا دەرووی خێریان لێ دەکاتەوە..؟؟
ئەمانەو سەدان (مەگەر)ی تر کە ناوترێ و نانووسرێ..؟!!
ئیتر نازانم بۆکەیی و تاکەی ئەم غیرەت و ھیممەتەتان دەجوڵێ و ھەر ھیچ نەبێ لەم کۆتاییەی تەمەنیشماندا بێت کەمێک دڵخۆشمان بکەن و ئاسوودەیی بە ھەموو ماڵێکی ئیماندار ببەخشن..!
ھەزار ئەفسوس بۆ موسوڵمانانی کورستان کە خودا پێیان دەفەرموێ: (واعتصموا بحبل الله جميعا ولا تفرقوا) ..
بەڵام زۆرترینی ئەوانەی کە تووشی شکست و ماڵ وێرانیی و ساردبوونەوە دەبن لە کاری ئیسلامیی.... ئیسلامییەکان و بانگخوازان و شێخ و مامۆستایانی ئەو رەوتەن..!
ئەفسووس جەنابی شێخ عوسمان نەمان پاراست و - دڵی موسوڵمانانیشمان رەنجاند ?.!!

عیرفانی ئەحمەد کاکە مەحموود - www.ahmadkaka.org