پرۆژەی وەرگێرانی تەفسیری رامان بە زمانی فارسی

پرۆژەیەکی نوێ و دڵخۆشکەر لە داییک دەبێ

یەکێک لە ئاواتە گەورەکانم ئەوە بوو کە پێش مردنم بتوانم بەو شێوەی خۆم دەمەوێ خزمەتی تەفسیری رامان بکەم و لەو رێگەوە بتوانم خوای دڵۆڤان لەخۆم رازی بکەم و پاشان ئاواتی باوکی خۆشەویستم و دواتر ویستی موسوڵمانان و خوێنەرانی تەفسیری ڕامان بھێنمە دیی و بتوانم بەو شێوەی کە شاییستەو لایەقە خزمەتی ئەو تەفسیرە بکەم، ئێستاش زۆر دڵخۆشم و مەمنوونی پەروەرێنمم کە تەفسیری رامان (لەگەڵ ئەو ھەموو بێ وەختیی و سەرقاڵی بوون بە ژیان) توانیویەتی ھەنگاوی بەرچاو بنێ و لە ئێستادا بووە بە یەکێک لە تەفسیرە نایاب و جێ متمانەکانی موسوڵمانانی کوردستان..
وەک مژدەیەک بە خوێنەران و دۆستان و خۆشەویستانمان لێرەوە رای دەگەیەنین کە پرۆژەی بە فارسی کردنی تەفسیری رامان چووەتە بواری جێبەجێکردنەوەو سوپاس بۆ خودا دوای وردکردنەوەو لێکۆڵینەوە لەگەڵ مامۆستایان و خۆشەویستانم لە شاری سنەو شاری مەریوانی کوردستانی ئێران گەیشتینە ئەو ئەنجامە کە وەرگێرانی تەفسیری رامان بە زمانی فارسی کارێکی زەرووریی و ھەنوکەییە بۆ کۆمەڵگای ئێستای کوردستانی ئێران..
لە ئێستادا تەفسیری رامان لەلایەن مامۆستای دڵسۆزو لێھاتوو مامۆستا کیومەرس یوسفی وەردەگێردرێتە سەر زمانی فارسیی و سوپاس بۆ خودا لە تەواوبوون و کۆتایی سوورەی بەقەرەدایە..
لێرەوە دەستی ماندوونەبووی مامۆستا کیومەرس یوسفی دەگووشم و زۆر زۆر سوپاسی دڵسۆزیی و لێھاتووییی دەکەم کە بەراستی لە رێی تلگرامەوە شەوو رۆژ لە پرسیارو وردکردنەوەی تەفسیرەکەدایە.. 
وە ھەروەھا سوپاسی بێ پایانم بۆ مامۆستایانی دڵسۆزم جەنابی مامۆستا محمد یوسف سەعیدو مامۆستا ئیبراھیم مەردوخی و مامۆستا رەئوف محمد سەعید دەکەم کە بەراستی لە ھاوکاریی و چاوساغیی کردنیان بۆ ئەو پرۆژەیە دەستی باڵایان ھەبوو..
دووبارە مەمنوونی خوای باڵا دەست و عەزیزانمم لە کوردستانی ئێران