یەکبوون و یەکڕیزى ئەهلى ئیسلام بۆچى.؟

یەکبوون و یەکڕیزى ئەهلى ئیسلام بۆچى ؟

- لەو کاتەوە پێغەمبەرمان محمد ﷺ خەڵاتى پێغەمبەرایەتى کرا، تا ئەو ڕۆژەى کۆچى دوایى کردو بەسەر بڵندیى و سەرفرازییەوە گەڕایەوە بۆ (الملأ الأعلى)، بە شەوو بە ڕۆژ، هەفتە، مانگ، ساڵ، بێ وچان پەیوەندى دەکرد بە تاک و کۆمەڵەوە، ئەڵبەتە پاش ڕێکخستنى ئوسرەو بنەماڵە شەریفەکەى خۆى، بە هەموو جۆرە توێژەکانى کۆمەڵگەى ئەو سەردەمەوە پەیوەندى دەکرد، بۆچى.؟! ئایا بۆ درووستکردنى کۆمەڵگەیەکى یەک بیروباوەڕو بۆچوون و یەک شێوە کارکردن نەبوو.؟!

- (13) ساڵى مەککەو (10) ساڵى جیهادى بێ وچانى مەدینەو (30) ساڵى خەلیفەکانى پاش خۆى، ئیتر با سەردەمەکانى پاش ئەوان بوەستێ تا دێتە خیلافەتى عوسمانییەکان – لەگەڵ هەندێ تێبینیمان لە هەڵس و کەوتى پاش سى (30) ساڵەى خەلیفەکان – ئایا بۆ یەکبوون و یەکڕیزى جیهانى ئیسلامیى نەبووە.؟!

- ڕیزکردنى ئایەت و فەرموودەکان سەبارەت بە یەکڕیزکردنى گەلى موسڵمان و نەفرین کردنى مشت و مڕو ناکۆکیى و دووبەرەکیى و پەرتەوازە بوون، جگە بە یەککردنى موسڵمان، چ مەبەستیێکى ترى لێ دەوەشێتەوە..؟ (وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا...)، (ولاتنازعوا فتفشلوا وتذهب ريحكم...)، (ولاتكونوا كالذين تفرقوا واختلفوا من بعد ماجاءهم البينات..)، (إن الذين فرقوا دينهم وكانوا شيعا لست منهم في شيء إنما أمرهم إلى الله..)، لەگەڵ فەرموودەى: ((..وأن تعتصموا بحبل الله جميعا ولا تفرقوا..)).( صحيح مسلم، كتاب الأقضية، باب النهي عن كثرة المسائل من غير حاجة، حديث : ‏3322‏. ) ((..عليكم بالجماعة وإياكم والفرقة فإن الشيطان مع الواحد وهو من الإثنين أبعد، ومن أراد بحبوحة الجنة فليلزم الجماعة..)).(رواه الترمذي، وصححه الألباني في الجامع الصحيح لسنن الترمذي، برقم:2165. ) ئەم ئایەت و فەموودانە چى دەگەیەنن.؟!.

- دەستە دامێن بوونى پێغەمبەرمان محمد ﷺ لەگەڵ موسڵمانان بۆ پاراستنى یەکڕیزییان و لیخن کردن و ناشرینکردنى پەڕاگەندە بوون وەک جوولەکەو گاور لەم فەرموودەدا هاتوون: ((إفترقت اليهود على إحدى وسبعين في النار، وافترقت النصارى على اثنين و سبعين فرقة، فإحدى وسبعون في النار، وواحدة في الجنة.، والذي نفس محمد بيده تفترق أمتي على ثلاث وسبعين فرقة، واحدة في الجنة واثنتان وسبعون في النار.. قيل يا رسول الله من هم.؟! قال: "الجماعة")).( صحيح، صححه الألباني في المجتبى من السنن لسنن النسائي، برقم: 3992.) لە ڕیوایەتێکى تردا هاتووە: ((وتفترق أمتي على ثلاث وسبعين ملة كلهم في النار الاملة واحدة.. قال: من هي يا رسول الله.؟ قال: ما أنا عليه وأصحابي)).( حديث حسن، حسنه الألباني في صحيح الجامع، برقم: 5343. ) چى دەبەخشێت.؟!

- ئایا تا موسوڵمانان یەک ڕیز بوون و لە ژێر یەک ڕایەت و ئاڵادا دەجووڵان، پیرۆزو سەرکەوتوو و سەربڵند نەبوون.؟! دەسەڵاتدارانى ئەو سەردەمە لە بەردەمیاندا بە چۆکدا نەهاتن.؟!

- حاڵەتى ئێستاى موسوڵمانانى جیهان – لەسەرتاسەرى وڵاتاندا – کە بە هەموو شێوەیەک دەچەوسێنرێنەوەو لە مافى سیاسیى و کۆمەڵایەتیى و ئابوورى خۆیان بێ بەش دەکرێن، ئەگەر کەسێکیش فزەى لێوە بێت بە توندڕەوو تۆقێنەرو (إرهابی) تاوانبار دەکرێ و توندى بەندیخانەکان دەکرێ و ئەویش دەبێ وەک مەڕى بەردەست قەساب، یا مردووى بەردەست مردوو شۆر، جووڵە لە خۆى ببڕێ، ئایا میللەت و گەلى ئاوا بە زیندوو لە قەڵەم دەدرێ.؟! سەرەڕاى ئەوە کە موسوڵمانان لە ئەستۆیاندایە حوکم بە فەرموودەکانى خواو پێغەمبەرە دڵسۆزەکەى بکەن و حوکم و دەسەڵات بگێڕنەوە بۆ خودا.!

- زیت بوونەوەى کوفرى جیهانى ئەمڕۆ لە موسڵمانە مەکتەبییەکان بێ جیاوازیى و، چەواشەکردنى سیاسەت و ئابووریى و ڕۆشنبیرایەتى و ئایینداریى و، ئاڵۆزکردن و شێواندنى بارى ڕاستەقینەى ئیسلام لە جیهاندا بە هەزاران هەزار هۆو بەکارهێنانى ڕاگەیاندن، ئیتر ئێستاى سەتەلایت و ئەنتەرنێت با بووەستێ، ئایا بارودۆخێکى ئاواى تیژڕەو، داواى پیاچوونەوە ناکات لە موسوڵمانانى جیهان و پێیان ناڵێت: برابن و یەکترتان خۆش بوێ و تەبابن و بە یەک شێوە کار بکەن، بە یەک ڕیز بڕۆنە پێشەوە، بە یەک بۆچوون (خیتابى سیاسیتان) پەخش بکەن، بە یەک ڕاگەیاندن وتوو وێژ بکەن، لەگەڵ گەلدا یەک دارایى و یەک سامان بن.

- نرخ دانەنان و گرنگى نەدان بە ئیسلامییەکان لەناو خۆى وڵات و هەندەراندا، بەتایبەتى لەکاتى ڕووداو و گۆڕانکارییەکاندا، ڕا وەرنەگرتنیان و پرس و مەشۆرەت پێ نەکردنیان بۆ چارەسەرى کێشەکان و قایل نەبوون بە مافى ڕەواى ئیسلامییەکان و ڕێز نەگرتن لە مقدسات و شیعارو درووشمیان و، هێرش هێنانە سەر ئیسلام و ئیسلامییەکان لەگەڵ ژمارەى زیاتر لە (ملیار)ێک موسوڵمان و باس نەکردنى مافیان لە (ڕێکخراوى نەتەوەکان) داو، ناچار کردنیان بە وەڵام نەدانەوەى بڕیارە ناشەرعیەکانیان، ئەمەش پڕ بە دەم هاوارو داواى یەکڕیزى موسڵمانان ناکات.؟!

- جیاوازیى و ئیختیلافى موسڵمانان لەناو خۆیاندا (فیکر) و (عەقیدە)، تا دێتە سەر شێوەى دەست نوێژو ڕۆژوو خواپەرستییەکانى تر، بێگومانم باجى خۆى داوەو بۆتە هۆى خۆش نەویستنى یەکترو کەم ئیحترامى بەرامبەر یەکتر، ئەوەش بە زەقى لە هەندێ وڵات و جێگادا بەدى دەکرێ و گەیشتۆتە ئاسۆ و تەنانەت لە هەندێ مزگەوتدا (جەناح)ێک تایبەت کراوە بە هەریەکە لە مەزهەبەکانەوە، وە هەر یەکە شێوەى تایبەتى خۆى هەڵگرتووە، وە بەهیچ شێوەیەک خزمەتى یەکبوون و یەکڕیزى موسڵمانان ناکات، بۆیە بەبۆچوونى ئێمە پێویستە ئەو شتانە لابدرێن کە دەبنە هۆى لەیەک ترازاندنى موسڵمانان و درووست بوونى (من) و (تۆ)، ئەویش بە کورتى بە گەڕانەوە دەبێ بۆ لاى (قورئان و سوننەت)ى صەحیح لە هەموو بوارەکاندا، لە سەرەتاى هەموویانەوە (عەقیدە) با لە ژێر ڕۆشنایى و ئایەت و فەرموودەکاندا دەرنەچێت، چونکە ئەوە ئاسانترە بۆ وەرگرتنى، نەک بئاڵێنرێ بە (فەلسەفە)ى ئەم و ئەودا، پێغەمبەرى خواش ﷺ هەر بەو قورئانە وانەى عەقیدەى وتووەتەوە، وا دەزانم لەوە زیاتر تووشى هەڵەو پەڵەیەکى زۆر دەبین، خواپەرستییەکانیش – لەگەڵ ڕێزماندا بۆ موجتەهیدە زەحمەت کێشەکانمان – هەر دەبێ لەگەڵ قورئان و سوننەت بەراورد بکرێن، ئەوەى ئەوان پشتگیرى بکەن و دانى پیادا بنێن، ئێمە وەرى گرین، بێ سەر لێکردنەوە لەوە: ئایا ڕاوبۆچوونى کام موجتەهیدە.؟! وە هەر کامیش لەگەڵ (کتاب و سوننەت)دا ڕەوتى جووت نەدەبوو، دەبێ بخرێنە ئەولاوە و نەکرێ بە ماڵ بەسەر ئیسلامەوە، پێویستە ئەوە بڵێین ئەگەر لە سەردەمى پێشوودا ئەوە گونجا بێت، ئێستا بە ئاشکرا دەبینرێ کە بۆ ئەمڕۆى موسڵمانان بەرژەوەندى تێدا نییەو پێویستە (متخصص) و پسپۆرانى (عەقیدە)و (فیقە) لە هەر وڵاتێکدا بن هاوکارى یەکتر بکەن و سەر لە نوێ هێڵە عەقیدەیى و فیکرە فیقهییەکان دیارى بکرێن و وەک (مەوسوعە)یەک بخرێتە بەردەست موسڵمانان، ئەڵبەتە پاش لێکۆڵینەوەو لە بێژنگدانى هەموو ڕاو بۆچوونەکان و بەراورد کردنیان لەگەڵ کتاب و سوننەتدا.

- کەوابوو پێویستە لە دەرگاى خۆیەوە هەموومان کار بکەین بۆ ئیسلام و بگەڕێینەوە سەر ئەو خاڵە سەرەکییە کە موسڵمانان هەموویان یەکدەنگن تیایدا، ئەوەش (وەحدەت)و یەکڕیزییە و پێویستە بە زوویى میکانزمێک بەڕێ بخرێ ئەگینا – ئەگەر چى ئێستا ئیسلامییەکان ئەندازەیەک یەکبوونیان پێوە دیارە – لە بەردەم هەزاران هەڵدێردا خۆیان دەبیننەوە.
دەبێ ئەوەش بڵێین سوپاس بۆ خودا ئیسلامییەکانى کوردستان پتر لە جێگاکانى تر برایەتى و تەبایى نێوانیان پارێزراوەو  چەندین لیژنە دانراوە بۆ ڕێخۆشکردن بەرەو یەکبوون، بەرهەمیش دیارەو هەموو شایەتى دەدەن.

- (زەمان) و (مەکان) قۆزتنەوە، نرخ دانان بۆیان شتێکى شاراوە نییە لە ئیسلامدا، بۆیە هەندێ کار ئێستا دەکرێ نابێ بخرێنە ڕۆژێکى ترو وە لە هەندێ شوێن زەمینە سازی دەبێ بقۆزرێتەوە، جگە لە هەموو ئەو خاڵانە باروودۆخى ئەمڕۆى کوردستان و میللەتەکەمان زیاتر ئەو وەحدەتەمان لا پێویست دەکات.

- دیارە لەبەر ڕۆشنایى ئەم خاڵانەو واقیعى جیهانى ئیسلامەتى ئەمڕۆ دەبێ بڵێین فرە حیزبى و (تعددیەت) هیچ خێرو بێرێکى بۆ موسڵمانان نەبووەو نایشى بێ، وە بە بۆچوونى من تەواوى ئیسلامییەکان گوناهبار دەبن ئەگەر بە پەلەو ورد هەنگاو نەنێن بۆیەکڕیزى خۆیان.

- بۆیە ئێمە هەر لە سەرەتاوە لەگەڵ برا ئیسلامییەکاندا کەوتینە وتووێژ و لێکۆڵینەوە سەبارەت بە بوونیاتنانى و شێوەى تەشکیلکردنى ئەو رێکخستن و یەکریزییە، شایانى باسە لەگەڵ زۆربەى ئەو برایەنانەدا کە ئێستا گەیشتوونەتە پلەى بەرپرسى، ڕامان گۆڕیوەتەوەو پەسەندیان بووەو پشتگیرى لێوە کراوە، بۆیە ئێستا – سوپاس بۆ خوا – زۆر براین و بە تەبا دەژین، ئەمڕۆش ئێمە بە ئەوپەڕى (مرونەت) و (سەماحەت) و متمانەو لێ بووردنەوە دەرگاى برایەتى و هاوکارى و یەکبوونمان واڵا کردووە لە خزمەتى هەموو ئیسلامییەکانداو چیمان پێ بکرێت درێغى ناکەین، لەگەڵ نەفەس درێژیى و قبووڵ کردنى قسەو قسەلۆکى ئەم و ئەو. سەرکەوتنیش هەر لاى خوایە. وما النصر إلا من عند الله العزيز الحكيم.


ئەحمەد كاكه مەحموود


بەروار2020/04/08سەردان 1323