ئيسلام و ماف و ڕێزى ئافرەتان.! (4)

وەڵامى گومانەكان لەسەر ئيسلام و ماف و ڕێزى بۆ ئافرەتان.! (4)

چپەیەك بۆ خوشكان:

 بەڕێزان: پاش ئەم لێكۆڵینەوە كورتەیە ئومێدەوارم ئیتر دوای فات و فیتی ناپاكان نەكەون و هەڵتان نەخەڵەتێنن..! چونكە ئیسلام تۆی بەڕێزی بە (خانم و سالار)ی ناو ماڵ داناوە.. بە قوتابخانەو یەكەم پەروەردەكاری مناڵ داناوە .. بەرگی ڕێزو ئابڕو و كەرامەتی كردووەتە بەرت.. لەگەڵ پیاواندا هاو ژیانن وەك یەك لە هەردوو جیهاندا.. بەڵام چەند ڕاستییەك هەیە لێرەدا – كە زانیاری لە سەدەی بیستەمدا سەلماندوویەتی – پێم چاكە بۆتان باس بكەم، ئەویش لە كتێبی (دائرة المعارف الكبری الفرنسیة)دا دەڵێت: (دڵ كە مەڵبەندی ژیـــــــانە، بەپێی لێكۆڵینەوە ڕوون بووەتەوە كە دڵی ئافرەت لە 60% گرامی لە دڵی پیاو بچووكتــرە، وە توانای بەرگری كەمتــرەو هەروەها كۆئەندامی هەناسەدان لای پیاو بەهێزترە لە كۆئەندامی هەناسەدانی ئافرەت.. هەر ئەو جیاوازییە سروشتیەیە كە پیاو لە یەك كاتژمێردا (11%)ی كاربۆن سەرف ئەكات، كەچی ئافرەت (6%)ی كـــــــەرتێك سەرف ئەكات..

 ئەمە بووە هۆی ئەوە كە توانای ژنان كەمتــر بێت لە توانای پیاو، ئەمە لەم بارەیەوە، ئینجا لە ڕووی پێنج هەستە پێكهێنەرەكانیشەوە مامۆستا (نیكۆڵس)و مامۆستا (پۆڵیە) دەڵێن: هەست كەری ئافرەت گەلێ‌ لاوازو بێ‌ هێزتــرە لە چاو هی پیاودا، بۆ نموونە: ئافرەت ناتوانێ‌ زۆر لە دوورەوە – ئەو ئەندازەیەی زانست دیاری كردووە بۆنی شت وەرگرێ‌... وە هەروەها سەلمێنراوە كە مێشكیشی بچووكتــرە لە مێشكی پیاو بە ڕێژەی (100) گرامی ناوەندی.

 وە لەسەر باسەكەیان دەڕۆن و دەڵێن: (ڤارینی) وتوویەتی: ئافرەت بەرگەی تەنگانە ناگرێت، چونكە زۆر زوو تێك دەچێ‌ و دەشڵەژێ‌، فەیلەسووف و هەڵكەوتوو (پرۆدۆن) دەڵێت: ویژدانی ئافرەت كەمتــرو لاوازترە لەچاو پیاودا، وە هەروەها تەبیعەت و سرووشتی ئافرەت لەگەڵ هەندێ‌ شتدا یەك ئەگرێ‌ و ئەگونجێ‌، كەچی هی پیاو ناگونجێت.

 دكتۆر (الیكسس كاریل)یش لە كتێبی (الانسان ذلك المجهول)دا كە باسی سروشت و ئیش و كاری ژنان دەكات لەلاپەڕە (108 – 109)دا دەڵێت: (ئەو جیاوازییەی لە نێوان ئافرەت و پیاودا هەیە، وە نەبێ‌ تەنها لە وێنەی تایبەتی ئەندامی زاوزێوە بێت،! یا لە بوونی منداڵدان و هتد.. بێ‌، یا لە شێوەی پێ‌ خوێندن و فێركردنەوە بێ‌.، ئەو جیاوازییەیان لە پێكهاتنی تێشووەكانەوەیە (تكوین الانسجة)، وە لە چاككردنی (تلقیح)ی لاشەوەیە، نە شارەزایی لەم ڕاستییانە بوو پاڵی نا بەوكەسانەوە كە بەرگری لە ئافرەتان دەكەن بۆ باوەڕهێنان كە: دەبێ‌ پیاو و ئافرەت یەك جۆرە خوێندن و فێركردن و پەروەردەیان ببێ‌... وە یەك جۆر ئەركیان بدرێ‌ بەسەرا. ئەوەی ڕاستی بێت، ئافرەت جیاوازی گەورەی هەیە لە پیاو، وە هەر خانەیەك لە خانەكانی لاشەی سروشتی نەژادی خۆی هەیە.

 ئەمە ڕاوبۆچوونى زانست و زانیارییە سەبارەت بە لاشەو قەدو باڵاو مێشك و دڵ و دەروون و توانایی ژنان... گومانیش نییە كە ئیسلام هەڵی نەبەستووەو بەكرێی نەگرتوون تا ئەوە بڵێن.. لەولایشەوە نە (قورئان) و نە (فەرموودە) بە ڕاشكاوی بەڵگەیەكی وایان تیا نییە كە ددان بنێت بەوەدا، هەروەك بەندێكیش نییە ئەوە ڕەت بكاتەوە، بەڵام دووریش نییە كە وا بێت، چونكە وەك لە پێشەوە باسمان كرد – لە باسی (قەوامە)دا – كە ئافرەت ئیش وكاری سەرەكی خۆی منداڵ بوون و، مناڵ هەڵگرتن و، پەروەردەكردن و پێگەیاندنیەتی، لەگەڵ هەندێ‌ (اختصاصات)ی خۆیدا، كە ئەوانە بە پیاو نەدراوە... گەلێ‌ شت هەیە بە ئافرەت ئەنجام ئەدرێ‌، بە پیاو ئەنجام نادرێ‌، بە پێچەوانەیشەوە ئاشكرایشە ئەوە ناتەواوی نییە بۆ هیچ كامێكیان، چونكە ئاوەدان كردنەوەی گێتی بە هەردووكیان دەبێت.

  دووریش نییە ئەوەی كە زاناكان تۆماریان كردووە ڕاست بێت، دووریش نییە هۆی پێویست كردنی (نەفەقە)ی ژنان لەسەر پیاوان شتێكی وا بێت... هەر بۆیەش لاپەڕەی تایبەتی كردووەتەوە بۆ هەردوولا - ژن و پیاو- لەگەڵ تۆماركردنی هەرشتێك لەگەڵ (تكوین الانسجة)یاندا بگونجێت، لەگەڵ ئەمانەیشدا خوێندن و فێر بوون و زانست و زانیاریی لێ‌ یاساغ نەكردووە... بەڵكو بە پێچەوانەوە گەلێ‌ (واجبات)ی ئیسلامی هەیە هەر بە ژنان پڕ دەبێتەوە، وەك (پزیشكی و وانەكانی خوشكان لە قوتابخانەو دانشگاكانداو، پڕكردنەوەی نەخۆشخانەكان –بەشی ژنان- بۆ نەخۆشی ژنانە)، ئەڵبەتە دەبێ‌ ئەوەش بڵێین: كە بۆچوونی ئیسلام ئەوەیە تا دەسەڵات ببێ‌ و بگونجێت دەبێت ژنان بۆ ژنان، پیاوان بۆ پیاوان، چارەسەری نەخۆشی بكەن، وە یان وانەكان بڵێنەوە..

 بەكورتی: پیاو كاری خۆی بكات و ژنیش كاری خۆی، هیچ كەس كاری ئەویان داگیــر نەكات بەناچاری نەبێت لەگەڵ تۆماركردنی ئەو ڕاستییانەدا، ئەم دوو تێبینییەم هەیە:

  1- من باسەكەم باسی ئیسلامە، نەك كۆمەڵگەی ئیسلامی چونكە ئیسلام ئەو هەموو یاساو قانوون و دەستوورانەیە كە پڕ بە باڵای ژن و پیاون، بەڵام نكووڵی ئەوەیش ناكەم كە لە كۆمەڵگەدا – كۆن و نوێ‌ – درێغی و قسوور هەیە سەبارەت بە خوشكان، لای ئێمەی ئیسلامی ڕێك كەوتووە خوشكێك ژنی پیاوێكی دڵڕەقی سەرسەخت بووە، نە شارەزایە بە یاساكانی مافی ژنان لە ئیسلامدا، وە یا دوور لە شارستانییەت و ژیاری ئادەمیزاد... وە یا هەر خۆی سرووشتی نەخۆش و لاواز بووە گوێی بە هیچ یاسایەك نەداوە، لەو جۆرە كەسانەیە كە (افراط) و (تفریط)ی زۆریان كردووە..! دەبینی لە هەندێ‌ ناوچەو وڵاتدا تەواوی ئیشەكانی دەرەوەی ناوماڵ سەپێنراون بەسەر ژناندا، بە زیاد لەكارەكانی خۆیشیان: (پاچەكۆڵەی پێ‌ دەكرێ‌، گێرەو كێشەو دروێنەی دەغڵ و دان و دانەوێڵەو... ئێوارەیش نان و چێشت و خواردن و خۆراك و پاك و خاوێنی و بەڕێ‌ خستنی میوان و.. هتد. لەگەڵ دانانی هەندێ‌ (قەید)و (قیود) لەسەریان كە (ما انزل الله بها من سلطان..)! وە یا لەكاتی بە مێرد دانیاندا بە زۆری خەنجەرو ڕاكێشانی چەك مارەكراوە بۆ پیاوێك كە بەڕاستی شەریعەتی ئیسلام هیچ كات ڕازی نییە بەو جۆرە هەڵسوكەوتانە، وە لە ژێر چەپۆكی باوكێكی نەزاندا، وە یا برایەكی ئارەزوو پەرستیدا مارە دەكرێ‌ بۆ سەرمایەدارێك، وەیا بۆ پیرەمێردێك كە بەڕاستی جگە لە بەرژەوەندی خۆیان هیچ بەرژەوەندییەكی ژنەكە نابینرێ‌..!

كاتێ‌ ئەوانە دەبینرێ‌ صەدان نەزان و نەخۆش دەیكەن بە هەرا لە ئیسلام و دەهۆڵی بۆ لێدەدەن..! من ئەوە دەڵێم كە بەڕاستی كەمتەرخەمی كراوە لەو مەسەلەیەدا، بەتایبەتی لەو كاتەوە دەسەڵات (سلطة) لە ئیسلام زەوت كراوە، هەر كۆلكە خوێندەوارێك هەستاوە بەناوی ئیسلامەوە سەدان ستەمی لە ژنان كردووەو وە لەولایشەوە ئیسلامی ناشیــرین و عەیبدار كردووە..
 ئەمە لێرەوە... پاشان ئێستایش بەناوی ئازادی و سەربەخۆیی ژنانەوە هەزاران كاری نابەجێ‌ ئەنجام ئەدرێ‌، كە بەڕاستی زۆر دوورو نەگونجاون لەگەڵ یاسای كۆمەڵایەتی و ژیانی هاوسەرییدا، وە دەبنە هۆی هەڵوەشاندنەوەی ژیانی ژن و مێردی، ژن بە ئارەزووی خۆی دۆست و خۆشەویست ئەگرێ‌ (بۆ ماوەی چەند ڕۆژێك وە یا بۆ چەند كاتژمێرێك..!! بێ‌ پرس و ڕا بە سەرپەرستەكەی دێت و دەڕوا، شەو ناگەڕێتەوە، لە شەوە پەمەییەكاندا، لە تیاتڕۆخانەكاندا دەبینرێتەوە...!! دەڕوات بۆ هەندەران..! بێ‌ پرس و مەشۆرەت لەگەڵ ئەم و ئەودا مێرد دەكات..! خراوەتە سەر كارگەكان بەیانی تا ئێوارە لە دەرگای دەزگایەكدا دەوەسێنرێ‌ بەناوی (فەراش)ەوە، وە یا كارەكەرێكەوە... وە یان ژنێك لەناو چەندین پیاودا كارمەندە... وە یان شەو لە خەستەخانەكاندا بەناوی برین پێچییەوە لەگەڵ چەند (مراهق)ێكدا دەمێنێتەوە..! وە یا بەناوی خوێندن و زانیارییەوە لە دانشگاكاندا – بەتایبەت – لەسەر یەك كورسی وە یا بەیەكەوە لە (شوققە)یەكدا دەژیین..! وە یا.. وە یا... بەڕاستی ئەوەیش لە سنوور دەرچوونە بۆ ژنان، لە سنوور دەرچوونە لە كەش و هەوایەكی سازگارو دوورە لە دڵەڕاوكێ‌ بۆ وەرگرتنی زانست و زانیاریی... بۆ تەداوی و چارەسەری نەخۆش.
 
 خوشكی بەڕێز: خۆزگە ئەمزانی كام زاناو كام فەیلەسووف دەڵێت: هەر ئافرەتێك جل و بەرگی ئیسلامی لەبەردابێت فێری زانیاریی نابێت! كام بلیمەت و هەڵكەوتوو دەڵێت: فیزیا، كیمیا، جەبر، هەندەسە.. بەسەری ڕووت و لاقی ڕوتەوە نەبێت نازانرێت..؟! كام پرۆفیسۆر دەڵێت: چارەسەری نەخۆش ئەگەر بە (حیجاب)ەوە بێت (مەفعوول)ی نابێت..؟! كام زانیاری دەڵێت: جل و بەرگی ئیسلامی بەرگری دەكات لە پێشكەوتن..؟!

 ئاخ! ئەمزانی خۆ دەرخستن بە ڕووت و قووتی و بۆیەی كوڵم و ڕوومەت و لێو سووركردن، تا چ پلەیەك دەبنە هۆی زانیاریی و نیشانەی پێشكەوتن؟! كەسێك هەیە بڵێت تەقینەوەی شۆڕشی پیشەسازی بێ‌ (حیجاب)ی سەری خست و دەستی گرت بەرەو پێشكەوتن..؟!

 ئایا ئەو مرۆڤەی فڕۆكەو، ئۆتۆمبێل و، تەلەفۆن و، فاكس و، كۆمپیوتەرو ڕۆكێت و بۆمبای ئەتۆم و ئەلەكترۆن و مانگی دەست كردو... هتد.. دروست كرد، لەلاق ڕووتی ئافرەت و بێ‌ پەردەیی ئافرەتەوە فێربوو..؟!

  لەكۆتاییدا دەڵێم: ئەمڕۆ ڕۆژی لێكۆڵینەوەو توێژینەوەیە، ئەمڕۆ سەدەی زانیارییە، سەدەی پەیدابوونی دەیان (وەسیلە)یە بۆ لێكۆڵینەوە، بۆ بەرئەنجام گەیشتن... ڕۆژی دركاندنی ڕاستییەكانە.. ڕۆژی ئەوەیە كەس كەس فریو نەدات.. ڕاستییەكان لنگاو قووچ نەكرێنەوە... ڕۆژی ئەوە نەما بڵێیت: (. . . لَا تَقْرَبُوا الصَّلَاةَ ...) (النسا‌ء: ٤٣) و (. . . وَأَنْتُمْ سُكَارَى ...) (النسا‌ء: ٤٣) ی لێ‌ بقرتێنێ‌... چۆن دەتوانن بڵێن: (عبدالرحمنی كوڕی عەوف) لە ترسی ئەوەدا موسوڵمان بوو كە خاوەنی ئەوەندە دارایی بوو، وە هاوەڵان بە زۆر سامانی خەڵكیان زەوت دەكرد، وە یا لە جەنگەكاندا بە زۆر بەر ئەبوونە سەرووگیانی خەڵكی..! 

  ئەویش لەترسدا بڕوای هێنا تا ماڵەكەی بمێنێتەوە..! بۆ سەیری مێژوو ناكەن..؟! بۆ مێژوو ناخوێننەوە..؟! تابزانن مۆڵەتی جیهاد كەی درا، وە (عبدالرحمن..) كەی موسوڵمان بوو..؟ عبدالرحمن هەشتەمیین كەسە بڕوای هێناوە لەترسی قوڕەیشدا نەیان دەوێرا سەر بێننە ڕۆشنایی، وە هەر بەبیــریشیا نەهاتووە ڕۆژێ‌ بێت (غەنیمەت)و دەستكەوتی جەنگی پەیدا ببێت..! پاش موسوڵمان بوونی ئەو، (13) ساڵ بەسەر چوو، ئەو جا لە (مەدینە)دا جیهادو غەنیمەت دەستی پێكرد..

 ئێمە ئامادەین گرفتەكانتان – وا دەزانم هەمووی دەگەڕێتەوە بۆ ئارەزوو و (جنس) – چارەسەر بكەین... ئەوانەتان توانیی نییە ژن بهێنێ، وە ناگونجێ‌ شوو بكەن، لە ژێر ڕۆشنایی ئایەتی: (وَأَنْكِحُوا الْأَيَامَى مِنْكُمْ ...) (النور: ٣٢)ی سوورەتی (نوور)دا، وە لەژێر ئەو یاسایەدا كە كاتی خۆی (عومەری كوڕی عبدالعزیز) دەری كرد: (هەركەس ژنی نییە سەر بدات با بۆی جێبەجێ‌ بكەین... مارەیی و پێداویستییەكانی تر...) ئێمەیش ئامادەین هاوكارییتان بكەین.! بەڵام دەبێ‌ ئەو ڕاستییەش بڵێین كە: ئێوە هەمان نەخشەی جوولەكەتان هەیە بۆ چەواشەكردنی لاوەكان و خەڵەتاندنی خوشكان، چونكە ئەوانیش گەورەترین چەكیان بۆ ڕووخاندنی قەڵای ئیسلام و بەنج كردنی لاوەكان  مەسەلەی ژنانە..! وەك لە كتێبی (بروتوكولات حكما صهیون)دا هاتووە.

 دوا وتە: ئێوە دەبێ‌ پێشتر زۆر بە ژیرانە ورد ببنەوە لەم بوونەوەرەیە تا خوا بدۆزنەوە.. چۆن دەبێت..؟ بڵێن: وەك پێغەمبەرەكەتان (ماركس) دەڵێت: (لا اله والحیاة مادة..)؟! دەگونجێت ئەو هەموو (ملیار) موسڵمانە خاوەن ملیۆنەها كتێب و جۆراوجۆری زانیاری، خاوەن هەزارەهاو ملیۆنەها فەیلەسووف و، مێژوونووس و، شارەزای زانیاری كۆمەڵایەتی... خاوەنی پزیشكی و جۆرەكانی زانست، هەمووی نەفام و سادەو گێل و وێڵ بێت..؟! چۆن دەتوانن بڵێن بوونەوەر بێ‌ خوایە..؟! لەسەرەتای جیهانەوە تا ئێستا لەخۆیەوە تەنها (خانە)یەك دروست بووە.. ئەی چۆن ئەو ئاسمان و زەوی و دەریاو وشكانی و، كێوو دەشت و خۆرو مانگ و ئەوهەموو ئەستــێرەیە دەدرێتە دەست (ڕێكەوت)ەوە..؟!  وە یا دەستی (سروشت)ەوە..؟! وا دەزانم هەر ئەوەیە پاڵتان پێوە دەنێت بۆ بڵاوكردنەوەی ئەم هەموو پڕو پاڵانتانە.. باوەڕیشم وایە جگە لەوەی كە دەتانەوێ‌ فەرمانی ئاغاكانتان پیادە بكەن شتێكی تر نییە.! بۆچی دوای دەهۆڵی ئەملاو ئەولاو دەكەون بەتایبەت ئەو بیرۆكەیە كە لە جیهاندا هەڵوەشاوەتەوە..؟! ئەوەیش بزانن كە بەدرێژایی مێژوو هەركەسێك شەڕەقۆچی لەگەڵ ئیسلامدا كردبێت، دەرەنجام سەری خۆی پان بووەتەوە. وە ئاشكرایە كورد گوتەنی: (هەركەسێك كەسە ئەلفێكی بەسە).

  بۆیە ئیـــتر وا دەزانم بوختانەكەی (خالید)و (هارون) زیادەیەو پێویست ناكات.. چونكە كەسێكی وەك خالید، پێغەمبەر s بەگۆترە نازناوی (سیف الله المسلول)ی پێ‌ نەبەخشیوە، وە هەرگیز ئەوە سیرەت و ژیاننامەی هاوەڵان نەبووە، ئەگەرچی بوختانی زۆریشیان لەسەر تۆمار كرابێ‌ لەلایەن جوولەكەو قوتابییەكانییەوە.

 (هارون)یش پێش ئەوەی بڕواتە سەر كورسی حوكم (100) ڕكات نوێژی سوننەتی كردووە، دەگونجێت پیاوێكی ئاوا تەقلەباز بێت و ئێوە گوتەنی (مەیمون) بنێـت لە ژنان..! هەرگیز ئەو جۆرە كردارانە لەموسوڵمان ناوەشێتەوە، بەڵكو ئەوە لەكاروكرداری ئێوەو ئاغاكانتانەوە نزیكە..! 
  نابینی چۆن یاری بە (مەیموون) و (سەگ) و.. هتد دەكەن..؟! نە هەر ئەوەندە بەڵكو هەر خێزانەی چەند سەگێك ڕادەگرێ‌..! من نازانم بڵێم بۆچییانە..؟! ئێوە خۆتان باش دەزانن.! 

  تێبینی: لەبەر ئەوە بەشایەتی قورئان و هەموو مێژووناسێك جوولەكەو گاور دەستكاری ئایینەكەیان كردووە بەئارەزووی خۆیان... من خۆم نەكرد بەخاوەنیان، با ئەوان خۆیان - ئەگەر خاوەن عیززەت بن – وەڵامی بدەنەوە.

سبحانك الله وبحمدك، أشهد أن لااله الا أنت أستغفرك وأتوب الیك.

11/ی (محرم)ی 1419ی كۆچی.
8/ی (ئایار)ی 1998ی زایینی.


بەروار2020/04/04سەردان 102